Zaoterdagaovend 26 oktober organiseerde ’t Huus van de Taol ofdieling Coevern veur het darde achterienvolgende jaor een Drèentse aovend, en dat deden ze weer in ’t museum van Schonnerd (Schoonoord): “Bij Ellert en Brammert in ’t Duuster”.
Dik 180 man gung in groepen het openlochtmuseum deur, en wat ’n gelok: het was ja dreug en hielemaol niet kold!
De verhaolenvertellers hadden dit keer ’n verhaol over de witte wieven, en de tenielclub oet Schonnerd deed hiel sfeervol ’n tenielstuk over diezölfde witte wieven op de hei.
Maor der was nog veul meer te zien en te heuren.
In ’t aole karkie vertelde domnee Jennie Lambers-Niers hoe ’t er eerder an toegung in de kark, en in de drukkerij vertelden de drukkers heur verhaol.
Twee mannen oet Slien hadden aole veurwarpen bij zuch: wel van de beide vertelde nou gewoon onzin, en wel vertelde de waorheid over die veurwarpen…
dát was de vraog!
Daoler en Wachtumer metwarking
Daolen en Wachtum waren ok goed vertegenwoordigd daor bij Ellert en Brammert.
Isa Uineken, Janiek Horsting, Zoë Reinders, Mans Snijders en Marin Snijders brachten met plezier heur gedichie van de Veurdrachtwedstried van ’t Aol Volk nog een keer ten geheure, en dat wuur mooi ofsleuten deur Nikki Kos: “Prachtig mooie dag” van Daniël Lohues, waaorbij zij zuchzölf begeleidde op de gitaar.
Wat hew toch een talenten in Daolen, én in Wachtum natuurlijk!
En dat alles wuur an mekaar praot deur Lineke Albring.
In ’t aole schoeltien van Schonnerd was ik nog even weer de juf, ach en hoe aans gung ’t er zo’n 150 jaor leden an toe!
De schriefles he’k het dit jaor veural over had: toen waren der ja nog gien tillefoons en computers!
Wat schreven ze mooi regelmatig, met sierletters ok, en wat was ’t belangriek dát ze zo goed (en netties) kunnen schrieven!
Ellert en Brammert
Op de tocht deur het museum kun ’t trouwens ok zo mar wezen daj Ellert en Brammert nog tegenkwamen! Ja, en volgens het verhaol waren ’t echt gien lieverdties, maor guster waren ze gelukkig hiel aordig!
Al met al was ’t weer ’n mooie aovend… veur de bezukers én veur de metwarkers!
Namens het Huus van de Taol ofdieling Coevern,
Hermien Boesjes
Foto’s Reina Zwiers en Gerda Kos
