Al ’n paar jaor organiseert Marketing Drenthe in oktober “Het Verhalenweekend”, en veurig jaor hef het ‘Huus van de Taol’ ofdieling Coevern daor veur ’t eerst an metdaon… ìn het Drèents natuurlijk!
6 plekkies
Op 6 plekkies in ’t museum in Schoonoord was wat te heuren, man man, wat kwam daor een volk op of: dik 380 man stunden der iniens!
“Dan doew dit jaor 2 aovenden, met anmelding veurof”, dachten wij. En ’t zat zó weer vol!
In groepen lupen de mèensen in ’t duuster deur ’t museum, en op 7 plekken was wat te doen: ’t verhaol van Ellert en Brammert, kinder die gedichies veurdreugen -zie ’t aandere verslaggie!- , de domnee in de kerk, de juf in de schoel, 3 mannen in de smidse, even wat eten en drinken, en niét te vergeten teniel van de Tenielclub oet Schonnerd… vrijdag vanwege het weer jammer genog bínnen maor zaoterdag weer op de hei! En alles in ’t Drèents natuurlijk.
Hej ’t mist? Wel wet tot volgend jaor!
Vanwege de harfstvekaansie kwamen de bezukers óveral weg, maor alleman kun ’t verstaon, dachten wij.
Zölfs “2 voor 12” op de tilleviesie deed metan: “Hoe heten de reuzen van ’t museum in Schoonoord?”, was ien van de vraogen vrijdag. Non, wìj wussen het antwoord wal, wij hadden ze nog zién… ze lupen der beide aovenden rond!
We hebt er 2 mooie aovenden had, met dank an al die vrijwilligers!
Hej ’t mist? Wel wet tot volgend jaor!
Namens het ‘Huus van de Taol’ afdieling Coevern,
Ger en Hermien Boesjes.
